يامن يوصل بيوت الشعر للغالي
الي غلاه بخفوقي هاضت شجونه
قولو له ان الغلا زاد وبرى حالي
والقلب فك الضلوع وباح مكنونه
من وين ما اصد عينه طيفه ببالي
صدري من الشوق كان الله في عونه
(سلمان وان قلت (سلمان) طالت امالي
مدري عن العين كيف تشوف من دونه!
من غير لا اسعى لشوفه شفته قبالي
وعيت عيوني تلامس نظرة عيونه
هذا هو المستوى لاخلاقه العالي
والي يموت بغلاته لاتلومونه
ولأمه وابوه بحنايا الصدر منزالي
والشوف لو يطلبونه يستحقونه
وعلى النقا اعلنت حبي له ولا ابالي
والي قريبين من (سلمان) يعرفونه
يا اغلى خفوقٍ عليه من الغلا صالي
تكفون قولوا له اني فيه مفتونه
حبه في قلبي غدا مضرب للأمثالي
اكبر من الحب مدري وش يسمونه
اشوف طيفه بعيني ويتهيالي
لاجابوا الناس طاري من يماشونه
يامن يوصل بيوت الشعر للغالي
الي غلاه بخفوقي هاضت شجونه