سلام يابنت الحلا والطيب والعقل الرصين
ياشيخةٍ ترقى على روس القمم بافعالها
سلامة الطرف الجميل وصاحبه تفداه عين
وكل المحامد للولي يومن يحسّن حالها
فيك انورت دنيا وطاب الوقت يالدر الثمين
وفيك اشرقت شمس المحاسن يوم نورك طالها
جيتي على صفو الوفا نبعٍ من الطيبة معين
تسقي على مر الزمن من قربوا من جالها
كريمةٍ هلّت مزون الطيب بالفعل الرزين
ثم ربّعَت كل القلوب اللي تشوف اِخْيالها
ساسٍ عريب ولاتبدّا نور حزاته يبين
قليل تلقى بالنِّسا منهي تجيك امثالها
النادرة بنت الكرام اللي لها قلبٍ فطين
منهو يشوف افعالها بالعين دايم شالها
نورة يابنت الحرار اللي لها القاسي يلين
ياللي وفاك مبيّن بمَدّاتك ويسعى لها
عفيفةٍ تملك على حسن الذِّكِر مبدا ودين
محبوبةٍ طول الدهر والطيب فاله فالها
شهريةٍ فيها المبادي وارثتها من سنين
صبيان ورجال الحجر مذكورةٍ بافضالها
رجال ابن نصرا وشجعان الوغى لامن يحين
شوف الدلايل ميّزت بالمعضلات رجالها
ياجعل وبل العافية يمطر عليك بكل حين
وتبقى مدايح حضرتك وانتي على منوالها
لك منزلة طاريّها مابين خلق الله يزين
لانك مزونٍ من وفا ماينقطع همّالها
ياجعله يتمم عليك ويرزقك حسن اليقين
وحدة مثل يمناك جعله ماتخيب امالها