طاب السمر يوم الهنا طلّ وحضر
والبدر غاب من الحيا بوصولها
يوم اشرقت كالنور واحلى من قمر
في ليلةٍ حلّ الهنا بفصولها
بانت سعاد وفاضت انفاس العطر
يوم ابتدت بالهُون خطو رجولها
طلّي حلا وعيونك الحلوه سِحر
تسبي عيون الناظرين فعولها
يافيصل اقبِل وامسك يديها وسِرّ
ياسِيْد خافقها وكِلْ منهو لها
عِزّ الرجال وهيبةٍ تملا الصدر
في رزّة الخطوة وطِيْب حلولها
ويارب تتهنّى ويَهنَاك العمر
وتلقى السعادة بالحياه بأصولها
ومبروك ياقلبين اندى من زهر
وهذي التهاني مايجف هطولها