تطيب القصايد والمعاني بها جزلات
هلا مرحبا بكل الحضور السنافيه
وكلْ من تعنّى واقبل بوافي الخطوات
وسَلْم الوفا بالناس مازال طاريّه
بحفل السلامه والف حمدِالله اللي جات
سلامات والله حافظٍ زولهم ليّه
لزايد عسى ربي يخلّيه له وقفات
(ولأحمد اخو من نبع يمناه مرويّه)
ومحمد سند عمري وطيبه عليه اثبات
اخوي الذي بالقَدْر منهو وصل زَيّه
اخواني وعزوة خافقي بأحلَك الليلات
وكل السند والطيب والخير والفَيَّه
سلمتوا بفضل الله ولا تكفي الابيات
بوصف المشاعر والمشاعر لكم حيّه
حصل ماحصل والله سلم من الصدمات
ولطف الله ردّ اثنينهم من بلاويّه
ويالله عسى دوم السلامه لهم بالذات
ويحفظ لِكلْ غالي بالايام غاليّه
وبالشكر والتقدير ماتوفي الكلمات
كرامٍ تعنوا بالحضور ولهم جَيّه